იყო ტურის გამყოლი ანუ გიდი ბევრ საინტერესო ადგილთან, თავგადასავალთან, გამოცდილებასთან და ზოგ შემთხვევაში უსიამოვნებასთან არის დაკავშირებული.

ნენე ახობაძე ქართველი სინოლოგი, ჩინეთის ისტორიკოსი და კულტურული ტურების გამყოლია, რომელმაც თავისი გამოცილება და ისტორია გაგვიზიარა.
ნენემ ბაკალავრის საფეხური თსუ-ში აღმოსავლეთმცოდნეობის მიმართულებით დაამთავრა, მაგისტრატურა კი ჩინეთში ჭეძიანგის უნივერსიტეტში გააგრძელა, სადაც სწავლობდა ჩინურ ენას და იკვლევდა ადგილობრივ ისტორიას. ის ახლა ფრილანსერ გიდად მუშაობს ძირითადად ჩინელ ტურისტებთან.

ნენე ტურიზმის სექტორში პირველად 2017 წელს ჩაერთო, როდესაც ტურში მისმა ჩინურის ლექტორმა გაუშვა. 2022 წელს, საქართველოში დაბრუნების შემდეგ სხვადასხვა კომპანიასთან დაიწყო თანამშრომლობა თავისუფალი გრაფიკით.

ჩემს საქმიანობაში ყველაზე მეტად საქართველოს სილამაზე მხიბლავს და მუდმივ მოძრაობაში ყოფნა. რა თქმა უნდა, ის ფაქტიც ახდენს გავლენას, რომ რაც არ უნდა რთული ხასიათის ტურისტი შემხვდეს რამდენიმე დღეში სამუდამოდ დავემშვიდობები, სადმე ოფისში ჯდომას, ისევ მყინვარწვერის ან უშბას ფონზე ხასიათის გაფუჭება ჯობს.
საქართველოში ძალიან ბევრი საყვარელი ადგილი მაქვს, მთლიანად საქართველოა საყვარელი. თუმცა გამოვარჩევდი სვანეთს, სადაც ყოველთვის თბილად მხვდებიან, ბევრჯერ მხოლოდ სვანეთის ხათრით ამიღია ტური. იმერელი ვარ და იმერეთში ნებისმიერ ადგილზე გავლა მახარებს, ხშირად ვხუმრობ 2-3 კგ მომატებული ვბრუნდები ტურიდან თუ იმერეთი მაქვს პროგრამაში-მეთქი. ახალციხეც ძალიან მიყვარს და გზა ჯავახეთისკენ.

სამწუხაროდ, ჩვენს სეგმენტზე ერთი და იგივე პროგრამაა, იშვიათია სვანეთი, მაგრამ თუ არის ტურისტების გულს მაშინვე იპყრობს და იქიდან წუწუნით მომყავს ყველა. შემდეგი არის სტეფანწმინდა და ბათუმი, სტეფანწმინდაში ბუნება და "ცასთან ყველაზე ახლოს მყოფი მონასტერი" ხიბლავთ(როგორც თვითონ ეძახიან), ბათუმში კი საქართველოს თანამედროვე სახე.

რადგან მე მხოლოდ ჩინელებთან ვმუშაობ, იმ სირთულეებზე ვიტყვი რაც მათთან მუშაობის დროს შემხვედრია. ბოლო წლებში დაბალბიუჯეტიანი ტურები მომრავლდა, რის გამოც ხშირად ორი დღის პროგრამა ერთ დღეშია მოსასწრები, ასეთ დროს მუშაობას ყველაზე გვიან დილით 9-ზე ვიწყებთ და საუკეთესო შემთხვევაში საღამოს 8-9-ზე ვასრულებთ, რაც უკვე ზეგანაკვეთურ მუშაობად უნდა ითვლებოდეს, თუმცა თუ ამას ითხოვ კომპანიებს პრეტენზიები აქვთ, ერთმა კომპანიამ 16 საათიანი სამუშაო დღის შემდეგ ზეგანაკვეთური რომ მოვთხოვე სხვადასხვა კომპანიებში რეკვა და ჩემი ლანძღვაც კი იკადრა. ჩვენთან ასევე სირთულეს წარმოადგენს ენის ბარიერი, რის გამოც ჩინურენოვნები უბრალოდ გიდები კი არა ძიძების როლსაც ვითავსებთ და ყოველ წამს ყველა დეტალის თარგმნა ან წარმოქმნილი პრობლემის მოგვარებაც ჩვენს მხრებზე გადადის. რთული ხასიათი აქვთ ჩინელ ტურისტებსაც, ხშირად ზოგ მათგანს ავიწყდება სხვისი კულტურის და ტრადიციების პატივისცემა და ამ მხრივ ყველაზე მეტად ისევ გიდი იჩაგრება.

მიუხედავად იმისა, რომ ჩინეთი მისთვის ერთ-ერთი საყვარელი ქვეყანაა, სადაც დიდი ცოდნა და გამოცდილება მიიღო, არც ჩინეთში და არც სხვა ქვეყანაში ცხოვრებას არ განიხილავს. ჩინელი ტურისტები საქართველოში სულ უფრო იმატებს, ენის მცოდნე კი ძალიან ცოტაა. ნენე საკუთარი პროფესიონალიზმით აცნობს და აყვარებს ტურისტებს საქართველოს.

View this post on Instagram

A post shared by ჩემი ჩინური ამბები/My Chinese Stories/我的中国故事 (@mychinesestories)

ნენესთან დასაკავშირებლად და მის შესახებ მეტის გადასაგებად მოიწონეთ გვერდი : ჩემი ჩინური ამბები/My Chinese stories/ 我的中国故事

ინტერვიუ